電影：真正感受 3D ~ "Pina"

先補祝各位聖誕快樂 － 鵬佬照例返咗三藩市探親，呢幾日除咗食同睇戲之外，都無做過啲咩，原本諗住去 Big Sur，不過就 book 唔到位去 Esalen 小住，幾可惜；不過最緊要都係見下家人同朋友，尤其係啲 "下一代"，真係每年都係呢啲過時過節先知啲日子過得幾快；今年個姪仔同姪女，一個已經讀大一，另一個高中，都各自帶 "朋友" 返我家姐屋企過節，先特然覺得自己真係老，諗都係時候開始學下 "持老賣老" (笑)。

講開睇電影，今年有幾套大節片都好想睇，例如部真人動漫 "Tintin" 同 Martin Scorsese 套 "Hugo" 都一次過睇哂，兩套都係 3D，不過如果真係要講立體感嘅震撼力，都唔夠呢套一啲電腦效果都無用過，叫 "Pina" 嘅 "記錄片" (上圖) － 部片個主角係過身無耐嘅德國現代舞蹈家 Pina Bausch，導演係另一位同鄉大師 Wim Wenders (拍過好似 "柏林蒼穹下" (Wings of Desire) 咁幾套得獎大片)，開拍嗰陣佢仲在生，原本係想透過佢本人自白同訪問，加插由佢編嘅幾部大小型舞蹈片段，作為向 Pina 一生成就嘅致敬，可惜中途佢就離世，原本 Wenders 都諗住再拍唔落去，不過最後得到佢啲家人同佢舞社嘅支持先可以完成。

鵬佬對現代舞一啲都唔識，不過好多 reviews 都話套片拍得正，3D 版又只喺灣區映幾場，去到立刻買飛；部電影有九成以上係舞蹈表演，有大部份係喺舞台拍，有啲喺外境，一邊睇一邊就越覺得如果真係由個好似 Wenders 咁嘅級數導演去拍，呢種現場 3D 感真係好過睇 live，尤其係其中幾段叫 "Wet" 嘅舞台表演 (下面有片段，套片個片花跟住呢條 link 有得睇)，啲舞蹈者喺個有一浸水嘅台上跳，捹起啲水花真係好似飛向啲觀眾塊面，加上啲女角個個有有把靚到可以拍廣告嘅長髮，配合上啲舞步，真係好似連人帶 "髮" 成個人喺你同個銀幕中間啲空氣裡面跳緊舞咁。

另外每段舞蹈用啲音樂都好得，有部份係原創，由一位鵬佬超鐘意，專做電影配樂嘅音樂人三宅純負責，包括下面段片個配樂，有機會再同大家介紹下佢。