同文化：2011 兩部超正基片介紹

年尾返咗美國灣區 (Bay Area) 過節，做得最多都係睇電影，除咗去戲院，喺鵬佬家姐屋企仲有 Netflix，可以用電視點播，就睇咗兩部喺 2011 年都幾獲好評嘅同志片 － 首先呢部 "Strapped"，美國獨立片，講一個年輕 "鴨仔" 有晚去接客 (個客都有段故，佢係前軍人，好多年前曾經向另一個軍中好友示愛，但係對方唔接受，仲打佢一身之後絕咗交)，完事之後想走但係座大厦特然變到好似個迷宮咁，係揾緊出路嗰陣就偶到幾個怪往客，先後包括一個成日玩 chem 吸毒嘅中年 "姨媽" 型同志同佢班年青波友，一個結咗婚又好壓抑嘅恐同 "衣櫃男"，一個已步入老年過住隱居生活嘅前同權份子，同最後一個好寂寞但係對愛情仍然好有希望嘅青年作家。

個故事其實好 "魔幻現實" (magical realism)，每個角色都好似係一個 symbol 代表緊某一類現代同志，喺尋找肉體滿足之中，大家都同時揾緊愛情，或係一啲超越性愛、人与人之間嘅一種聯繫；雖然有時啲對白係造作咗啲，不過幾個要角都發揮得好好，做得好生動，鵬佬一邊睇一邊都喺幾個角色身上揾到自己同好多朋友嘅 "影子"，不過更值得讚係睇完之後會去反醒下：自己究竟喺呢個人生階段係喺到揾緊啲咩，得到嘅又係咪自己想要嘅呢？

好似 "深" 咗啲，不過呢部 "Strapped" (下面有片花) 整體都非常可觀，加上個男主角 "Ben Bonenfant" (上圖，呢條 link 有佢一段訪問) 真係好養眼；佢只係 20 出頭，直仔一名，但係都演得好自然，尤其係啲 sex scenes，雖然啊 Ben 唔係鵬佬嗰 type，不過場場 "激情戲" 都睇到好有反應，所以希望佢已後有發圍，可以係其他電影同電視見到佢。



另外又睇咗呢部德國嘅 "Drei" (即係數字 "3"，下片有 trailer)，係大廠片，因為個導演係拍過好似 "Run Lola Run" (中譯好似叫 "暴走羅拉") 咁幾部賣座片個 Tom Tykwer；部片個題裁比較成熟，講一對剛過 40 歲嘅專業 "優皮" 夫婦 Peter 同 Hanna，雖然兩人仍然相愛，但係婚姻生活開始乏味，咁啱兩人又分別偶上一個成功又型仔嘅已離婚雙性戀者 Adam，喺唔知情下兩個都同 Adam 發生咗越軌嘅行為，最後就因為 Hanna 發現自己大咗肚 (不過佢都唔肯定邊個係老豆)，卒之先東窗事發。



個結局係點唔想 spoil，不過睇完又覺得個故事入面對現代婚姻，同點樣先係一種可以叫做滿足到個別需要嘅親密 "伴侶" 關係有好多啟發，對於我地班同年紀特別有意思；唔知喺香港有無 DVD 賣，有的話呢兩套都值得收藏。