音樂： 80 年代 J-Pop 偶像風

上星期收到一個喺日本舊同學嘅 email，問鵬佬有無興趣幫佢打緊工本報館出嘅一本雜誌寫文，以外國人身份嘅角度講下日本流行文化對佢地嘅影響，呢位朋友又知道我對 80 年啲女性 "偶像" 有些少研究，所以就叫我不如寫下呢班歌手喺香港嘅普及程度；佢咁睇得起小弟，個 topic 又有趣，當然答應，不過我反而提意如果只係講當年香港歌手點樣係舞台表演、衣箸咁跟日本，又十居其九有大量翻唱 J-Pop "口水歌"，不如集中講下呢班好似松田聖子、中森明菜咁係市場同音樂定位上面有邊樣最成功，而且係當年班華語歌手想跟都跟唔到。

有得鵬佬咁年紀班唔多唔少都會迷過下一、兩個 "idol"，尤其唔知點解我地班基 "仔"，問翻好多都係聖子或明菜迷，之外仲有河合奈保子、柏原芳惠咁都幾紅；由於出道陣仲好後生，所以好多初期啲歌都唱到好鬼差，只係賣 cutie 同包裝，成日比人彈係 "雞仔聲"，不過上到一線或頭二線啲，一定要係無論唱功、才藝上面有表現，先可以 keep 住競爭力同 "入到屋"，要不斷啲歌都上到個榜，只係靠班仔妹買碟就好快死得，因為呢啲偶像一過 21、22 歲以上，就已經係 "老餅"，仲著住啲公主裙扮可愛肯定比人話超齡加老土。

因為咁，要唔想比人淘汰，迫住嫁人或消失，或更可憐到去拍寫真 (柏原芳惠係此一招嘅人版)，就要過到由小女孩變成真係歌手呢個 "成人" 關；大家可能覺得 Akira (中森明菜) 係當時喺呢方面最成功，不過如果要講音樂上嘅突破，鵬佬覺得 Seiko (松田聖子) 同 Naoko (河合奈保子) 先係表表者。Seiko 出道無幾耐就係一線，一直係純情派作表，但係為咗過 "成年" 呢關，喺 1983 年就出過佢喺音樂風格同制作上面最成熟嘅大碟，亦可以話係當年 J-Pop 嘅作表作。

首先係年頭張 "ユートピア" ("Utopia")，開始走啲所謂 "新音樂" 風格，一次過放棄哂之前啲 "兒歌"，入面隻重點細碟 "天国のキッス" ("天國之吻") 仲係揾日本電子音樂班霸 YMO 成員細野晴臣作曲同做監制；到年尾出張 "Canary" (上圖)，更加高調試玩好似電子、迷幻咁唔同風格，而且錄音好用本，用當年最先進嘅技術，明顯係要脫離班中學生 fans 嘅水平；當年鵬佬只係靠聽我大佬買啲 cassettes 先有得聽，要喺好後期先知當年呢隻黑膠嘅日本版，係好多人揾嚟做 Hi-Fi "發燒" 試音碟。



依家聽翻大家可能唔覺得好特別，不過好似上面隻 "Misty"，係首近 30 年前嘅錄音，可以話非常前衛，加上當年大部份買佢碟啲都係啲聽慣一般有小小 "低能" 嘅 pop 嘢同得十幾廾歲嘅 "細路"，所以呢步喺商業性同歌手定位上面係非常冒險；另外隻碟首主題曲，又係 Seiko 首次自己作曲，而且可以有水準到可以同其他幫佢寫歌，好似松任谷正隆咁班大師級一齊有比較，加上同年出過啲細碟，好似 "Sweet Memories"、"瞳はダイアモンド" ("眼睛像礸石") 咁都係為咗擴大 Seiko 嘅成人市場，準備離開偶像市場；雖然之後佢又走返啲無咁大胆嘅 idol pop 路線，仲話自己係永遠少女偶像，不過成 30 年都仲企得住，又係一位全能創作人，呢樣都好靠佢當年 83 年打下嘅基礎。

另外差不多同期要轉營仲有 Naoko，佢就選擇走啲美式 Adult Contemporary 路線，喺 1984 年出咗張 "Daydream Coast"，喺美國錄音，揾咗當年紅監制 David Foster 制作成隻大碟，係佢最好賣嘅大碟之一，成功之後隻 "Nine and a Half" 照版煮碗，仲夠胆主力以美式唱膛唱英文歌做賣點 (下面隻 "Finding Each Other" 最正)，特出自己係班 idols 之中最唱得嗰個，又係順利過到 "成人" 關嘅好例子；之後同 Seiko 一樣都做咗唱作歌手，反而仲喺香港因為隻 "月半小夜曲" 更多人識，玩多咗幾年又攞好多音樂獎先收山。



咁香港呢？唔洗講邊個，睇下隊 "孖生妹"，到變哂中女加裸照都仲係十年如一日扮純情，仲係唱到走哂音，呢樣係日本 30 年前比，出道只玩包裝扮 cute 只可以夠用兩、三年，之後轉慢啲同無咁有水準同實力就死得嚟比較，已經無得比。

不過你問小弟最迷邊個？大家都可能唔識呢個原田知世，"雞仔聲" 代表，呢隻 "天国にいちばん近い島" ("最近天國之島") 到依家都成日 loop 住嚟聽；佢其實係角村揾出嚟，係主力拍戲多過唱歌，嗰陣真係鍾意到以為自己係 "直" (笑)；大家當年又迷邊個？下面留 comments。

PS － 呢排大家可能覺得小弟成日離題，不過 "鴨評" 以依家個市咁，真係無乜好寫，下次有機會真係要探討下點解搞到咁悶局。