遊記 － 聖誔 Big Sur 遊

希望大家過咗個好 "合皮" 嘅聖誕，大隻鵬就飛咗返多倫多探親，再匆匆順道三藩市同一個 (異性) 老友去咗兩日 Big Sur；喱個地方自己想去咗一段時，今次主要係為咗探喱個最近失婚嘅朋友，陪佢散下心。Big Sur 係國家公園 (見左圖)，喺三藩市灣區 (Bay Area) 南邊，開車要 3、4 個鐘，先由 1 號公路經過 Monterey 同 Carmal，再開幾十分鐘就會到；Big Sur 出名係沿海風境同溫泉，我地就去咗一個叫 Esalen 嘅 "會所" 住咗一晚。

Esalen 係一個幾特別嘅地方，係由一班 "嬉皮仕" 喺 60 年代開始喺喱個地方定居，自己種田自給自足，後來就發展成為一間 "學院"，比一啲研究所謂 New Age 哲學嘅學者去 "靈修"；佢地依家都經常有搞啲學術會議，同定期有啲短期課程，另外亦會開放比人去短住。



(上圖 1：Esalan 一家小屋；上圖 2：串個小瀑布的木橋；上圖 3：在崖邊的溫泉浴池)

其實如果去短住，個地方我覺得似一個渡假村多啲，最大賣點係有一個露天溫泉浴池，就喺個懸崖邊，可以望住個太平洋，聽住啲風同海浪聲，真係比錢都唔容易買到，最搞鬼係當晚個室內浴池重有人現場彈樹琴！另外係每餐啲食物都係 organic，大隻鵬咁大個仔真係未食咁甜嘅西芹。咁環境同包足三餐，每人每日收 170 美金 (不過要住就要先做會員，收 30 美金，由於我個朋友係 member 我唔洗比)，如果肯瞓大房啲上下格床重平啲，低過台灣，去日本更加唔得。咩嘢叫人間天堂，喱個地方可以話喺我去過最近似。