土耳其遊記 (1)：廾分鐘由歐洲坐船去亞洲

終於放完假，尋晚由伊斯坦堡飛返香港；今次去土耳其首先去咗東邊山區一個叫 Kars 的小城市，目的主要係去行一個叫 Ani 的廢墟 (見圖，為城外的圍牆，睇相唔係好覺，但係有六、七層樓咁高)。簡介下啲歷史 － Ani 係中世紀亞美尼亞王國首都，絲路上面一個貿易重鎮，人口有二十萬，繁榮程度係當時同其他好似開羅、君士坦丁堡 (即係前伊斯坦堡) 啲中東大城市有得揮，但係佢地可謂命途多舛，到咗十一世紀被土耳其塞爾柱帝國入侵，將全城人殺哂，跟住嗰二百幾年主權不斷轉手，中間都算返過下身，直到蒙古人殺到嚟就被完全打殘。加上不時有地震，其後嗰幾百年人口慢慢流失，整個城市差不多係歷史中煙未。

地理上 Ani 係正土耳其同亞美尼亞邊境，佢兩國可謂世仇，早十幾年前重有邊境沖突，所以哩咁個重要歷史遺跡到咗前幾年先開放，如果係前年去重要先攞 permit，不過依家唔洗。大隻鵬一直對中東歷史好有興趣，加上 Ani 啲早期君主同原居民係最早一批基督徒，所以入面有好多拜占庭式 (Byzantine) 建築，雖然日久失修，入面重有二間教堂保存得幾好，重有個型睇得到。土耳其一路都唔重視喱個地方，但係依家 Ani 已經成為聯合國世界文明遺跡，要重點保護同發掘。



(大部相重整理緊，遲啲會放上網)

另外 Kars 都係千年古城，上世紀初被當時蘇聯统治過，雖然依家人口得幾萬，但係啲俄國人留落整個城市規劃就好 grand，啲街好闊，過兩三個 blocks 又有銅像又有水池，可惜依家就好破爛。Kars 近年又再出名，原因係多咗人去 Ani 之外，土耳其藉諾貝爾文學獎得主作家 Orhan Pamuk 最出名一本小說 Snow (或 "Kar"，土耳其文指雪) 就係以 Kars 做背境；不過去到 Kars 就唔好提本書，因為個題裁好 depressing，有興趣自己睇下。

去完 Ani 就向黑海方向進發，目的係去行有差不多四千米咁高嗰 Kackar 山脈；先坐車去另一個小鎮 Yusufeli，一定要提下喱個地方，因為佢可能好快會係地圖消失，原因係土耳其政府近年大興土木，起咗好多水壩，喱區係正下個目標地點，如果真係要起不單止 Yusufeli，再入啲啲小鎮全部都要搬，因為成個山谷就係壩底。不過 Yusufeli 只係路過，去到馬上租車去先睇另一間過千年聖母教堂，下午再開車去 Kacker 山脚一個聚脚點 Barhal，住咗一晚第二日就自己上山，不過唔係行過主峰，因為一定唔夠時間，加上年紀大囉，要自量下。改行西邊個 Karatas 峰，都有三千三米，來回兩日 OK，加上可以睇全土耳其最高個瀑布。

回程先經東邊一個比較大城 Erzurum，無乜嘢睇馬上等二日提早飛返伊斯坦堡玩多日。個題目當然佢指伊斯坦堡橫貫歐亞洲，由歐洲嗰邊市中心海傍 (Eminonu) 坐船 20 分鐘去 Uskudar 區，就叫到咗亞洲！咁大隻鵬有無揾到鴨仔玩呢？咁當然無乜嘢難到小弟啲好其心，去到伊斯坦堡第一晚過境就揾到間鴨仔 sauna，全場唔係土耳其仔，而係庫德人 (Kurdish)，走之前又去一擭，戰况下回分解。