夫子自道: 大陸出差有感

隨便呻幾句 - 大隻鵬因為工作關係每個月都要北上，通常唔係北京就係上海，真係坐飛機坐到想嘔，要成日返大陸出差啲朋友都知會幾辛苦，啲機成日delay不特止，大隻鵬其實最鬼憎係港龍啲annoucements，啲空姐真係噏到好似死唔斷氣咁，英文講得差都算，就連廣東語都滿口懶音，啲普通話重嚇死人，如果我係大陸或台灣人我諗我有七成唔知佢講乜，總知一起飛就幾分鐘聽佢用啲唔鹹唔淡兩文三語唸喃嘸；就嚟降落重死，要唸埋啲轉機航班號，應該係照住讀都讀到天一半地一半，如果無個iPod塞住對耳真係比佢煩死。

今次去北京特別聽到話搞乜禮貌運動，上面叫"文明"喎；其實一般"老百姓"除咗粗老啲以外，大隻鵬覺得喱幾年都好大進步，最大問題反而係啲有教育又開始揾到錢嗰班；今次係北京某大五星酒店check out，得兩個服務員，大隻鵬走到去一個做緊客，另一個做完叫我等等，佢要入返office攞嘢，咁我企咗一陣左邊就殺個大陸佬出嚟，佢一見做女receptionist走返出嚟就大叫要退房，大隻鵬要凶佢一嘢先收口；跟住比咗張門卡個女仔，點知右邊又跳個全身Prada啲大陸婆又話要check in，個女receptionist叫佢等等佢就係O起個嘴，過咗一陣多一個服務員走出嚟個Prada婆就鬧人，話點解啲五星酒店啲服務咁慢。

依家大陸最多就係喱啲，見得多都開始無反應。

另外，知道有位巴打中年四十男又開咗個北上尋歡Blog，好好睇，大家又多一個揾料好地方!

夫子自道: 大隻鵬"真身"肉照被公開？

第一次開 Blog，其實都無諗過會唔會有人睇，最緊要係怕怕地會比人鬧；準備好就隨便去好多人落腳嗰Toilet Wall留言版發咗個算係公告，都無諗重點去宣傳，點知唔洗兩日個Blog條Link就比人貼咗係一個北美華人同志 Forum，攪攪下重有人貼咗張話係大隻鵬啲肉照(見圖)上網；老實講，喱位哥哥睇落好正，但係大隻鵬真人重正啲喎... (笑)

其實依家真係知道在網上發咗啲文字係收唔返，加上寫啲嘢有人會覺得係不道德，你知啦，依家網上咁多"憤青"，鬧都唔夠，又成日要起人底，所以之前就諗好用Blogspot，因為所有佢地啲Blogs係大陸通通禁哂，上唔到，另外重從新開個Gmail，加上用好地道廣府話寫作，咁讀者羣只係限於香港人。

所以，上網留言同叫鴨一樣，安全為上！