電影: 日本大導演大島渚過身

今朝一早睇新聞，見到日本大導演大島渚去世嘅消息，真係好可惜；佢老人家近年健康都唔太好，95 年中過風，之後都半退休中，近廿幾年都只係拍過一拍 "御法度"，不過佢導演過近三十部電影，仲未計電視同出書，佢對日本以至全世界嘅電影文化都有好大影響。

大島出身於日本政治動蕩嘅 50 年代，佢本身亦非常激進，屬於當時反建制嘅左派知識分子，電影風格亦較受歐洲新浪潮嘅影響，尤其係同期喺法國班好似高達 (Jean Luc Godard) 同杜魯福 (François Truffaut)，而佢第一部成名作 "青春殘酷物語" 就係以青年犯罪犯做主角，手法亦以用大量 handheld 喺實境拍攝，跟住較出名嘅 "日本の夜と霧" 同 "絞死刑"，除咗繼續以社會被邊緣化人物 (social outsiders) 嘅故事做主題，即加入大島對當時日本社會同政治嘅一啲大議題，好似美日安保條約同歧視韓國僑民咁。

70 年代後係大島嘅高峯期，拍攝手法亦無已前咁偏激多變，題材亦開始轉向以性禁忌探討人性衝突同黑暗面，之後套 "感觀世界" (愛のコリーダ)，更加係禁片之王，因為喺部片入面男女主角不但全露，而且所有性愛場面都係打真軍，個足本都依家都未喺本地上影過；鵬佬當年十幾歲喺多倫多睇過一個所謂足本，都已經非常驚嚇，不過後來先知個百份百版本仲有場口交吐精同玩雞蛋，睇過啲巴打會知我講乜 (笑)。

佢最後其中兩部大作，就完全配合佢對性文化同社會邊緣族群嘅喜好，兩個題目加起嚟就係同性戀："戰場上的快樂聖誕" (Merry Christmas Mr. Lawrence) 同 "御法度" 其實都係通過日本人對同性戀又執迷、但係又畏懼嘅迷思，用嚟探討日本傳統同軍國主議文化。依家番睇呢兩部主流基片都係大師水準，尤其係 "御法道"，係所有對日本近代維新前後歷史同文化有興趣嘅就係必睇嘅作品之一。

"戰場.." 係講二次大戰，一個英國戰俘同一個日軍軍官一段曖昧嘅關係，不過衰咗個 casting，由當時已經係神級搖滾同電子音樂巨星 David Bowie 同板本龍一做主角，可惜兩個啲演技實在麻麻，尤其後者，由頭到尾一個表情。 好彩兩個好多戲份嘅配角，演班戰俘代表個 Tom Conti，同演另一個軍官，當的仲好年青嘅北野武，佢地喺戰後重逢嗰幕 (下面有片)，每次都會睇到鵬佬眼濕濕。

今次大島過身，亦代表呢班戰後成名嘅電影巨丈時代過去。

電影: 肯定係全年最佳 Gay 片 "Milk"

另外喺三藩市嗰陣又同啲老朋友去睇戲，咁當然揾啲好想睇但係又知喺香港無得上要等 DVD 啲新片；一直想睇係 Sean Penn 套新片 "Milk"，係真人傳記電影，講 70 年代美國同志運動先駟 Harvey Milk ，由佢點樣喺三藩市成為全美第一個經選舉成為市政府 supervisor (區議員咁上下) 嘅公開同性戀者，到佢比另一個議員槍殺嘅經過。

部片個導演係 Gus Van Sant，可以話係荷里活最成功嘅同志電影人，由比較藝術到商業片都拍過好多部出名又賣錢嘅電影 (好似早期有奇洛里維思部 gay 片 "My Own Private Idaho"，麥廸文一炮而紅部 "Good Will Hunting" 咁)，所以除咗 Sean Penn，啲配角都好多明星，好似做 Harvey Milk 男朋友個 James Franco (見圖)，都係啲又靚仔又起得好快慨新星。

咁多年以嚟 gay 片就越拍越多，但係啲題裁又越嚟越主流同軟性；喱部就好政治，個訊息係喱一代 (喺美國，但係都可以包哂啲比較開放嘅地方) 啲 gay 民無乜警覺性，覺得好多嘢係必然，又唔願去出頭，但係諗返喺幾十年前去 bar 去 sauna 都可以比差人拉，加上由當時到依家都有好多 (特別係宗教) 組織向我地施壓，依家啲所謂 "好日子" 可以隨時消失。有機會大家記住揾 "Milk" 嚟睇，不過可能要等幾個月有 DVD 出先得，依家大家可以按喱條 link 睇下片花先。

同文化：正正壯態漫畫「田舍のもてなし」

最近日本有個 friend 用 Winny 下載咗戎橋政造個新長篇「田舍のもてなし」，重 email 哂比大隻鵬，真係開心死；上次去東京原本想買，點知玩到忘哂型，最後都無返去間書店。戎橋一直幫 G-Men 劃插圖，啲畫功有啲似田亀源五郎，但係佢啲漫畫題材比較有人情味同鄉土，啲 sex scene 無咁 SM 味，男角年紀都大啲。

整個故事好簡單，無乜主題，只係講係鄉下一間餐廳個仕應啲性啟蒙，應該係 G-Men 連載過，所以每章都有性場面，唔會有悶場。戎橋係大隻鵬最近比較鐘意追，我知松武係香港同台灣多啲粉絲，不過我就麻麻地，另外電雷也都睇好多；喱本「田舍のもてなし」唔知台灣有無出中文版，不過戎橋應該會紅，我個老友話佢另一本新書「魚屋健介」都係熱賣中，睇怕吓次去日本個 Amazon 訂書要記著買，唔好成日 "分享"咁衰。

同文化： 三島由紀夫影集

早排有個老反send咗啲相嚟，係佢係網上揾到一本好舊啲三島由紀夫影集入面啲"美男圖"；佢係乜水？佢係日本戰後最重要作家之一，而且成名得好早，作品有好多，出名啲有「金閣寺」同寫同性戀部「禁色」，好後生就入圍過諾貝爾文學獎；我諗依家未必咁多人重讀佢啲小說，但係佢係武仕道精神上腦，最後為反對日本日漸西化而「殉道」切腹自殺就好多人會知。

依家好多日本極右所謂愛國主議者都重封佢係偶像，佢本身係唔係同性戀啲事實對某啲日本人嚟講都係好禁忌。除咗寫書，佢都影好多相，流傳較廣就係呢批"美男圖"；相中可以睇到佢認為乜嘢係傳統日本男性美，可以話佢係四十年前已經同日本主流同志情慾(homo-erotic)定咗型，加上有啲SM啲所謂極端男性化表現，大家係好似田亀源五郎喱一批作家同創作人啲漫畫都睇得到。

大隻鵬係日本早稻田大學讀書嗰兩年都有修個有關三島由紀夫啲小說啲courses，好鬼多啲日本衣櫃男去讀；無論如何，喱批相絕對有收藏價值，大家去開東京二丁目啲書店重應該揾到好多佢啲照片集。

(下面可點圖放大)