同政治: 恐同背後的政治計算

最近單反歧視法案鬧得熱烘烘，上週日班由富貴教會恩福堂射水做金主、背後當然由嗚肛發功加影音使隊打鑼打鼓站台嘅耶教恐同勢力卒之哂馬，喺立會外面搞個萬人祈禱會，擺明迫狼英就範 (雖然大會話佢地冇反對資訊)，唔好喺施政報告中提要做立法諮詢；除咗人力，加埋幾份報紙廣告，今次都怕要幾百萬埋單，目的當然係要向政府同整個香港顯示政治實力，之不過鵬佬同啲有搞緊同權嘅朋友傾開，好多人仲好似停留喺啲宗教霸權嘅層面上，或係比好似蔡志森等人嘅肛交論搞到幾情緒化，有啲仲非常悲情，但係只要認清楚呢班人背後嘅動機，大家先可以見招拆招。

對宗教仇恨組織 只能用政治手法應付

其實鵬佬一直話政治爭拗應該通過政治手段解決，真係無必要同佢哋講咁多耶穌 (笑)，因為好似蘇穎智咁都唔係亦唔會同我地講道理，由反家暴到反歧視，到幾個包括陳世強、吳恩源、李炳光、陳一華之流入咗選舉委員會、有份選特首又同嗚肛係同一條偽道德路線，加上經由支持梁美芬入立會、幫西環大搞河蟹，呢班 "官商教" 連串勢力都係唔會放過利用宗教嘅偽道德高地去撈政治油水，之後再用嚟同當權者討價還價，好多時都係為咗擴張個人同佢地個堂口喺宗教界入面以至整個社會上嘅地位同勢力。

咁蘇穎智背境當然十分保守，係拉斯神學院 (Dallas Theological Seminary) 嘅碩士畢業生，呢間基本上係美國近代極端保守福音派嘅培訓基地，同佢係校友就有個 Bryan Fischer，係當地頭號煽動恐同，被評為係一個 "仇恨組織" (Hate Group) 嘅 American Family Association (AFA) 嘅發言人；Fischer 出哂名專用啲非常帶有攻擊性嘅膠論反同權，基本上係語不驚人死不休 (佢提出過納粹黨係由同性戀者組成)，而依家姓蘇嗰班提嘅所謂 "逆向歧視"，完全出於 Fischer 嗰套 "零和理論" (Zero-Sum game)，下面短片解釋得好清楚：

即係你唔比我話事，喺法律同制度上歧視同性戀，就等於侵犯我宗教自由，又或者你比同性婚姻合法化，就等於破壞我地個宗教指定嘅一夫一妻制，亦都係等於侵犯我個宗教，係完全迫對手入哂死角冇彎轉，所以喺好似美國一個以選舉為基礎嘅民主制度，對佢地嚟講，剩低都只係赤裸裸鬥政治本錢，即係邊個可以動輒喺選票夠多就惡，完全無得亦唔會有理性討論。

從呢個角度，加上睇番好似 AFA 等嘅發展，大家就唔洗再為佢地啲大學生 "做鴨論" 而動氣，因為呢啲膠論喺目的就只係分化，搞對立，將自己班會眾引入同一個思想上嘅死胡同，同迫對方一直要追住對呢啲歪論回應，而且用呢類手段對姓蘇呢班喺短期內係無政治成本 (除咗林以諾，下面再講點解)，所以只要無恥，更膠更毒更無理性嘅歪論都講得得出。

最有效對付教棍：提高反同權政治成本

咁有乜對策，按鵬佬個人意見，大家首先應多用啲時間了解下呢班本地耶教恐同嘅背景，無論出面或唔出面，搞清楚呢班人嘅關係，所謂知己知彼，先可以打呢場政治硬仗 - 呢幾日上一上網，先發現蘇穎智同 Fischer 係校友，前者又將後者嘅逆向歧視理論同政治運動手段照搬嚟香港，小弟就唔明點解無人提過，或去 check 下佢地又無交情，因為睇返近十幾年嗚肛同本地班福音派同美國班耶教極極右份子行得好埋，而且喺好多場合都有意無意提出國教論(已前有詳細寫過 "Dominionism"，即係以耶教治國)，或最少喺啲社會道德有關嘅立法攞番話事權，用嚟做籌碼同執政者討價還價。

另外鵬佬又聽到好多人話點解佢地講啲嘢咁膠同無邏輯，都仲有咁多人跟，而且有唔少係有教育同中產，仲唔一定係年紀偏中老年；咁呢個想法首先係低估咗姓蘇呢班牧者嘅魅力，因為佢地成功搞得起咁大間會堂，肯定係講道、人事關係同管理上有佢個人之處，而堂口人數多寡，就係基教入面邊個夠惡同聲大嘅主要指標；咁呢班信徒返得呢幾間堂，跟咗呢班牧師一段時間，肯定係好接受佢地嗰套，而班教友如果又係喺教會嘅恐同環境中長大，其實好難喺短時間入面令到佢定轉向支持同志。

所以只要明白喺呢班恐同領袖入面邊個係用緊反歧視做 "磨心議題" (wedge issue) 撈政治油水嘅教棍，大家就唔需要在為佢哋嘅言論起火，只需要不斷指出佢地嘅謬誤，終有一日佢地會講到出哂火位；另外點解佢地亂嗡得咁過癮，最主要都係因為好多同志收埋自己，正如好多人上網亂咁鬧人，都係因為唔識得、又見唔到對方，當被侮辱班個個有名有姓，而且有啲仲有頭有面，亦都表示亂用膠論辱罵會開始有政治成本，咁佢地自然會停手。對班信徒亦一樣，當中好多人被誤導，原因係基於對陌生事物嘅恐懼，當有一日佢哋身邊有信任同親密嘅人同佢地 come out，往往會令到佢地對同性戀者完全改觀。

要平權 必先有高能見度

所以有名人同志出櫃肯定係有好大推動作用，最重要係令到一般階層嘅都開始有勇氣 come out，唔再覺得基係需要遮瞞嘅醜事；其實大家見到同權運動係歐美有好大進展，最大嘅動力都只係個社群越來越 visible，同新一代對同性戀嘅態度有好明顯嘅改變，呢種社會意見轉移 (opinion shifting)，喺任何公民社會都係大潮流，絕對唔係姓蔡姓蘇呢班人抵擋得往，莫講嗰個要靠明星藝人開 show 上電台電視嘅林以諾，只要有日佢覺得無論反歧視定反同性婚姻係無著數，就會自動轉軚，仲邊同你講咁多聖經倫理。

上面講個意見轉移喺香港都係啱啱開始，依家有班社會領袖同明星名人帶頭搞個 "大愛同盟"，希望唔係只得霎時衝動，而係可以長久做落去，更重要係開個天窗，同班較開明嘅耶教牧者同信徒交流，另外各位有條件嘅衣櫃男女，都係時間最少伸個頭出嚟呼吸下新鮮空氣。